ხვალ, საქართველოს ეროვნული საფეხბურთო ნაკრები 2014 წლის მსოფლიო ჩემპიონატის შესარჩევი ეტაპის მატჩში, მსოფლიოს და ევროპის ჩემპიონს, საფრანგეთის ნაკრებს უმასპინძლებს. შეხვედრა თბილისის დროით 22:15 საათზე დაიწყება. დღეს კი, სამფეროვნებმა "დინამო არენაზე” მატჩისწინა ვარჯიში და პრესკონფერენცია გამართეს. გუნდის კიპერის უგო ლორისის შემდეგ, ჟურნალისტების შეკითხვებს ნაკრების მთავარმა მწვრთნელმა, დიდიე დეშამმა უპასუხა.

- საქართველოსთან მოგებული თამაშის შემდეგ, საფრანგეთის ნაკრებმა ოთხი მატჩი გამართა და ვერცერთში იმარჯვა. გუნდის თავდამსხმელებს კი გოლების გატანა უჭირთ. ხომ არ იქნებოდა უპრიანი გამოგეძახებინათ "მონაკოს” ფორვარდი რივიერი? (შეკითხვა ქართველ ჟურნალისტს ეკუთვნის)

- თქვენ ფრანგი ხართ? (იცინის) ვფიქრობ, ჩემს მიერ შერჩეული შემადგენლობა ოპტიმალურია. რივიერს რაც შეეხება, მას მივეცით შანსი, მაგრამ რაღაც დააკლო, თუმცა, რასაკვირველია, ის კვლავ იქნება ნაკრებში გამოძახებული.

- პარიზში გამართული შეხვედრის შემდეგ, რა შთაბეჭილება დატოვა საქართველოს ნაკრებმა თქვენზე, რა მიგაჩნიათ მის ძლიერ და სუსტ მხარეებად?

- საქართველოს ნაკრები ეს არის გუნდი, რომელსაც ნამდვილად შეუძლია სიურპრიზი შემოგვთავაზოს და ამისი ნათელი მაგალითი ესპანეთთან ჩატარებული შეხვედრაა. ქართველთა შორის გამოყოფდი ანანიძეს, რომელიც თავისი სისწრაფით გამოირჩევა, ასევე თარგამაძესა და ოქრიაშვილს.

- საქართველოს ნაკრების ყაზახეთთან ამახანაგურ შეხვედრაში მარცხი, საქართველოში კატასტროფად შეფასდა. დავუშვათ, ხვალ დათმეთ ქართველებთან, როგორ შეფასებას მისცემდით ამ ფაქტს?

- რა თქმა უნდა, მე ვნახე ეს თამაში, სადაც თქვენი გუნდი კარგად ვერ გამოიყურებოდა, თუმცა ნამდვილად არ მაქვს იმის მოლოდინი, რომ ხვალაც მსგავს ნაკრებს ვიხილავ. ის ამხანაგური შეხვედრა იყო და ასეთ საჩუქრებს ნამდვილად არ ველი.

- მოუგებელი მატჩების შემდეგ, ხომ არ ფიქრობთ, რომ თქვენს მიმართ ნდობა დაიკარგა და რამდენად დიდ მნიშვნელობას ანიჭებთ ამ მხრივ ხვალინდელ მატჩს?

- არა, რასაკვირველია არა. ვფიქრობ, იმ მატჩებში იყო გარკვეული პოზიტიური მომენტები, რისი აღნიშვნაც აუცილებელია. რაც შეეხება ხვალინდელ შეხვედრას, ჩვენ საკმაოდ სერიოზულად ვემზადებით და 3 ქულის აღებას ვგეგმავთ.

- თქვენ აღნიშნეთ, რომ ამ ორ თამაშში 6 ქულის აღებას გეგმავთ. ხომ არ იქნება უმჯობესი, ამ მხრივ რიტორიკა შეცვალოთ, ვინაიდან მსგავსი მოლოდინები ადრეც გამოგითქვამთ, თუცმა შედეგი რეალურად სხვა იყო. და რამდენად რეალური ეს ბოლო დაპირება?

- შესაძლებელია გარკვეული შეცდომები მართლაც დავუშვით, იგივე რეპლიკების დროს. თუმცა ეს მნიშვნელოვანი არაა. მთავარია რა ხდება დღეს გუნდში. მიუხედავად წარუმატებლობისა, ჩვენ თამაშში ბევრი პოზიტიური მომენტიც იყო.

- ხშირად ისმის კრიტიკა ბენზემას მისამართით. უნდა ველოდოთ თუ არა, რომ ის ხვალ უფრო მეტს მოინდომებს მოედანზე?

- ვერ ვხდები კითხვის არსს. ჩვენ ყველა ძალიან ბევრს ვშრომობთ და ბოლომდე ვიხარჯებით. ის, რომ შედეგი არ გვაქვს, ამის ბრალი არაა. ცალსახაა, არაფერს ვაკლებთ და მუდმივად ვცდილობთ განვვითარდეთ. რასაკვირველია, ყველას შეუძლია იყოს უკეთესი, თუმც ყველა მაქსიმუმის გაღებას ცდილობს და ამ მხრივ კრიტიკა ცოტა არ იყოს და მიუღებელია.

- რა ცვლილებებს უნდა ველოდოთ ხვალინდელ მატჩში?

- ამას ხვალ ვნახავთ და შესაბამისად ხვალ ვისაუბროთ.

- რას ფიქრობთ, არსებული შემადგენლობა სრულად მზადაა ამ მატჩისთვის, თუ სჯობდა აქცენტი კიდევ უფრო გამოცდილ ფეხბურთელებზე გაგეკეთებინათ?

- აბსოლუტურად დარწმუნებული ვარ ჩემი არჩევანის სისწორეში. ნამდვილად ოპტიმალური შემადგენლობა შევკრიბეთ და ყოველივე ამის შედეგს ხვალ იხილავთ.

ოთარ მუმლაძის ფოტოები
მალხაზ გედევანიშვილი, Geosports.ge